Ek’t grootgeword in ‘n huis waar daar dadelik met konflik afgereken is. Ja, ons het dalk bietjie luidrugtig gekommunikeer en baie kreatiewe skelname vir mekaar uitgedink, maar dan was dit oor en verby en was ons weer lief vir mekaar. Die bakleiery sou ons dan ook nooit weer in die toekoms teen die persoon hou nie, want dis mos verby en ons het vergewe. Want ons is onvoorwaardelik lief vir mekaar.
Ek’t egter vroeër vanjaar die nare ondervinding gehad dat iemand konflik met stilstuipe hanteer het. Nie net het die persoon die hele dag vir homself ongelooflik sleg gemaak nie, maar ook vir al die ander mense om hom. Ek probeer regtig om daardie dag nie teen die persoon te hou nie, maar dis moeilik, want dit het baie seerder gemaak as iemand wat my slegsê, of vloek. Ek’t wel in die tyd met hierdie worsteling oor wat om uit die situasie te maak, maar probeer navors, met die hoop om te verstaan waar die persoon vandaan kom (elkeen het mos ‘n storie).
Ek wou gil van frustrasie!
Stilstuipe is ‘n kinderagtige, onvolwasse manier van konflikhantering waar jy so optree met die doel om die ander persoon te ‘spite’. Jy doen dit omdat jy hulle wil manipuleer om te ja en amen op als wat jy sê. Ek kan nogals dit insien aangesien die persoon nogals ‘n ‘control freak’ is en dit seker toe nou nie kon duld dat ek ook ‘n opinie het nie. Stilstuipe is ‘n vorm van emosionele mishandeling. Fisiese mishandeling kan gesien word en word ook darem gesond. Emosionele mishandeling vat egter soveel langer. En ek kan alreeds sien hoe die persoon se emosionele mishandeling nie net op my nie, maar ook op ander, ‘n vreeslike negatiewe invloed het. Ek is eintlik gelukkig want ek’t dit nie toegelaat om so behandel te word nie, al het ek nogsteeds in die proses seergekry.
Hoekom stilstuipe so sleg is: Dit maak jou ongewild. Dit maak dat die ander persoon nooit weer hul vertroue in jou sal plaas nie en nooit in jou sal kan ‘confide’ of eerlik sal wees oor hul emosies en gevoelens nie. Ek hoop van harte dat ek my verhouding met die persoon weer eendag sal kan regmaak. Alhoewel ek nie dink ons ‘n wrok nog teen mekaar koester nie, weet ek nie of ek ooit weer vir die persoon respek sal kan hê soos wat ek vroeër gehad het nie. Waar ek vroeër regtig opgekyk het na die persoon en selfs sou raad vra, is dit iets wat nie sommer weer sal gebeur nie. Stilstuipe is marteling. As gevangenes gestraf word, word hul in isolasie geplaas – die hardste straf. So as jy werklik vir iemand omgee, hoekom gaan jy hul die slegste straf moontlik gee? Jy wil graag vir die persoon wys hoe kwaad jy is en dat hy/sy verdien om nie jou liefde te kry nie. En dit laat die ‘slagoffer’ dan ook twyfel of jy ooit lief was vir hom/haar aangesien liefde veronderstel is om onvoorwaardelik te wees.
Waar leer mense om stilstuipe as konflikhantering te gebruik? Meestal is dit swak gedrag wat hul van hul ouers of ander gesagspersone oorgeërf word. So in ‘n mate moet mens jammer voel vir mense want dis al wat hulle ken. Soos die sê-ding ook is: Hurt people hurt others. Ek’t nooit die persoon se ouers geken nie, so sal ook nie weet of dit vandaar aangeleer is nie. Dus kan ek hul glad nie blameer nie. Die ander rede is natuurlik om te manipuleer, soos al tevore in my skrywe genoem is. 
Soos ‘n 2-jarige wat nie die speelding wat hy graag wou hê gekry het nie en nou in die hoekie sit en ‘sulk’ en homself bejammer met die hoop dat iemand tog sy vreeslike bejammering sal raaksien.
Wat kan jy doen in plaas van om stilstuipe te gebruik: As jy baie kwaad is, gaan koel eers af vir 10 minute. Praat dan die saak uit soos VOLWASSENES.
Wat kan jy doen as jy die stil behandeling kry? Moenie agteroorbuig om weer die persoon se guns te probeer wen nie. Omdat stilstuipe in baie gevalle ‘n manipulasie-meganisme is, gaan jy hom net in sy swak gedrag versterk. ‘n Beter idee is om die persoon reguit te sê dat jy graag die kwessie wil uitpraat sodra hy/sy daarvoor gereed is.
Nou ja, nou voel ek ook sommer beter na ek bietjie hier vertel het. Nou hoop ek dat ek en die persoon weer eendag dalk ‘n verhouding sal kan hê. Hopelik is die berg nie te groot om te klim nie…
Biografie... http://www.vitanova.co.za/Articles/TabId/877/ArtMID/2636/ArticleID/95/Stilstuipe-in-n-verhouding.aspx http://www.yourtango.com/experts/dr-margaret-paul/silent-treatment#.VGYgnPldVZJ
illa quae puto 